ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបញ្ជាក់ថា សម្តេចនឹងផ្តល់ម៉ាស៊ីនស្ទូងស្រូវចំនួន ១០០គ្រឿង ដល់ក្រសួងកសិកម្ម រុក្ខាប្រមាញ់ និងនេសាទ ដើម្បីចែកជូនទៅដល់សហគមន៍កសិកម្មដែលផលិតស្រូវពូជ។

នាពិធីបិទសន្និបាតបូកសរុបលទ្ធផលការងារក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃទី២៤ ខែមីនា ឆ្នាំ២០២៣ នាយករដ្ឋមន្ត្រីបានជំរុញឱ្យផលិតពូជស្រូវផ្ការំដួលឱ្យគ្រប់គ្រាន់ដើម្បីបំពេញតម្រូវការទីផ្សារ។ ជាពិសេសជំរុញឱ្យស្រាវជ្រាវរកពូជស្រូវដែលធន់នឹងអាកាសធាតុ និងធន់នឹងសមាសភាពចង្រៃ។

សម្តេចថ្លែងថា៖ «យើងដាក់ (ម៉ាស៊ីនស្ទូងស្រូវ) ទៅកន្លែងផលិតពូជស្រូវ កត្តាពូជគឺជារឿងសំខាន់ ដូច្នេះយើងត្រូវជំរុញ ដើម្បីបើកទូលាយឱ្យប្រជាពលរដ្ឋអាចដាំដុះ»។

សម្តេចនាយករដ្ឋមន្ត្រីបានគូសបញ្ជាក់ថា សម្តេចបានទិញម៉ាស៊ីនស្ទូងស្រូវចំនួន ១០០គ្រឿងក្នុងអំឡុងពេលសម្តេចចូលរួមទស្សនាស្តង់ពិព័រណ៍ផលិតផលខ្មែរនៅពិធីបុណ្យទន្លេនៅខេត្តកំពង់ធំកាលពីថ្ងៃទី០៩ ខែមីនា ឆ្នាំ២០២៣ កន្លងទៅ៕